كيف يرى رائد الأعمال المصري محمد أبوالنجا شركات التمويل الاستهلاكي؟.. تعليق مهم

قال رائد الأعمال المصري محمد أبوالنجا، «يشهد الله إني اتكلمت عن مخاطر التوسع في خدمات «اشترِ الآن وادفع لاحقًا» (BNPL) من 4 سنوات، وتم التنكيل بيا، واتهموني إني اترفدت وبداري الرفد وكلام غريب، والحقيقة إني اعترضت على كل ده، وسبت فلوس ومجد رهيب علشان الشغلانة غلط في رأيي، وكل من هب ودب عمل BNPL وبهدلونا».

وأضاف أبوالنجا في منشور له عبر «فيسبوك»: «البنوك بتسلف الغني يعمل مشروع ويرد الفلوس، لكن الست الغلبانة اللي بتستلف علشان تجوز بنتها وتدفع جنيه على الجنيه، ولما تتعطل تستلف من شركة تانية علشان تدفع، وتتهدد بالحبس ويتشهر بيها، وكل جريمتها إنها عايزة تجوز ولادها».

وتابع: «والابن اللي راح اشترى بالقسط تليفون مش محتاجه أصلًا، بس معاه "رصيد" يشتري بيه، فالأب باع أساسيات علشان يسدد مكانه، وبقى الأنقح اللي بيستلف فلوس يراهن بيها على الماتشات».

وتابع أبوالنجا حديثه قائلًا: «شكرًا إن الموضوع رجع تاني.. بكرة هيكلموني يهددوني تاني زي زمان.. لو حصلي حاجة اعرفوا إني اتكلمت في القصة دي من الأول.. وربنا يحفظنا جميعًا ويستر علينا ويحفظ مصر وأهلها الطيبين».

وكان هشام عز العرب، الرئيس التنفيذي للبنك التجاري الدولي CIB، قد حذر من تنامي مخاطر التمويل غير المصرفي على الأفراد والدورة الاقتصادية.

وأوضح عز العرب أن الأفراد غير القادرين على الاقتراض من البنوك يلجأون إلى مؤسسات التمويل غير المصرفي بتكلفة مرتفعة، معربًا عن شكوكه بشأن التزام بعض تلك المؤسسات بسياسات التقييم الائتماني المنضبطة المطبقة داخل البنوك.

وقال إن البنوك تعمل وفق قواعد رقابية صارمة يضعها البنك المركزي المصري، تشمل نسب احتياطي وإجراءات تقييم ائتماني دقيقة، بينما تعمل بعض شركات التمويل الاستهلاكي تحت أطر رقابية مختلفة قد تكون أقل تشددًا، ما قد يخلق فجوات تنظيمية داخل السوق.

وأضاف، خلال مداخلة هاتفية ببرنامج الحكاية عبر قناة MBC مصر، أن سرعة اتخاذ القرار في شركات التمويل الاستهلاكي تمنحها ميزة تنافسية، لكنه شدد على ضرورة التزام جميع الأطراف بنفس مبادئ الحوكمة وإدارة المخاطر لتجنب ما وصفه بـ«المراجحة التنظيمية» التي قد تؤدي إلى سلوكيات مالية غير متوازنة.